O Sindicato Nacional de CCOO de Galicia leva xa máis dun ano coa campaña «12 meses de sensibilización en prol da igualdade no eido laboral». O obxectivo desta iniciativa é impulsar a incorporación dos conceptos e a terminoloxía sobre a igualdade. No mundo laboral, a desigualdade persiste porque non temos palabras para nomeala ou porque as palabras que usamos están cargadas de prexuízos.
Fálase dun sindicato feminista e da fenda de xénero para asumir unha identidade política. Enténdese que a loita de clases e a loita feminista son indisociables, e que para transformar o mundo do traballo cómpre desmantelar as estruturas patriarcais que organizan a produción e a reprodución.
Na segunda edición da campaña, amplíase o foco cara á igualdade nos coidados desde a corresponsabilidade. Recoñece que a desigualdade laboral non se produce só no lugar de traballo, senón que está profundamente ligada á división sexual dos coidados, á sobrecarga das mulleres nas tarefas de reprodución social e á falta de políticas públicas que garantan a corresponsabilidade efectiva.
Trátase de construír unha cultura sindical capaz de nomear, analizar e transformar as desigualdades estruturais. Nun contexto en que a dereita e a extrema dereita tentan desmontar os avances en materia de igualdade, iniciativas como esta son ferramentas de resistencia e de construción de alternativas. Porque saber de que se fala cando se fala de igualdade é, tamén, saber por que se loita.
María J. García Barcia. Secretaria de Mulleres, Políticas de Igualdade e LGTBIQA+
Disponible en castellano aquí
